She

She is so wonderful that she deserves belonging to another wonderful one who can handle, give warm, make safe, and understand this wonderful girly girl...

Although each one of them thinks the other is a crazy one (A)... But s/he believes s/he should be there for his/her soulmate...

And then she decided not to belong to anyone ... And to keep searching for her inner soul ...and by the way she is searching, her wonderful one will find her :)

خواطر شقية ومجنونة

اكيد عاوزه اكون فى ضللك... بس لو ضللك ده يساعنى
لما شمسك تحرق شمسى .... وقمرك يزين قمرى ...يبقى اكيد ضللك يساعنى
لما شروقك يسبق شروقى... وغروبك يلحق غروبى... يبقى اكيد ضللك يساعنى
لما دموعى تحرق قلبك... ولما ورودى تحييى صحرتك... يبقى اكيد ضللك يساعنى 
هاااا... ممكن يساعنى ؟؟

استبدل الندم بالتعلم...واتحدى نفسك قبل ماتتحدى الدنيا

الشجاعة مش إنك تغير إجابة السؤال... الشجاعة إنك لو إتسالت نفس السؤال 100 مرة تجاوب نفس الإجابة...لأنك لو غيرت الإجابة تبقى إنسان جبان ضعيف ..أو يمكن يائس بتهرب من المواجهة مع الدرس اللى لازم وآن الأوان إنك تتعلمه...لو هربت منه ومن غيره هتلاقى حصلة حياتك بتقرب من الصفر... ومينفعش أصلا 

الهروب...لازم تواجه نتائج وتبعات إجابتك...ولازم تلاقى المغزى من الحكاية...لأن آن الأوان

عمر ما أبواب الدنيا هتتفتحلك لو مهاودتهاش واتعلمت الدرس اللى لازم تتعلمه...هتآخدك من تحدى لتحدى وهتدور فى دايرة مفرغة مش هتخرج منها إلا لو قررت تتعلم ولو عديت فالمستوى الأعلى من الدرس ونتايجه وصوره...وبكده تستبدل الندم من حياتك بالتعلم ...

التحدى إنك تتعامل مع الحاضر وتغير المستقبل...الحماقة إنك تعاند الماضى وترجع متخيل إنك ممكن تواجهه وتغيره...لأنك عمرك ماهتقدر

الفرق بيننا وبين شباب ٢٥ يناير

أصدقائى الأعزاء   خلونى آخد من وقتكم 5 دقائق بس...   إحنا كلنا كان الانترنت ووسائل الاتصالات مقطوعة فترة 5 أيام الأسبوع اللى فات ...ثم عادت الحياة من جديد من 3 أيام...رجعنا كلنا هنا على الفيس بوك...وكننا كلنا مخنوقين أوى من اللى بيجرى وعاوزين نتكلم ونقول رأينا   الحمد لله كلنا قلنا رأينا...وعبرنا كفاية عن وجهات نظرنا وإحنا مع أو ضد الثورة ...   المشكلة بقى لما بدأنا نتكلم فى هل الشباب يفضلوا فى ميدان التحرير وللا يمشى...إنت مع استمرار بقاء الوضع الحالى لحين رحيل الرئيس وللا نستنى 7 شهور اللى باقيين فى مدته ...والناس بقى اللى بدأت تهاجم الشباب أو تؤيدهم وما إلى ذلك من آراء...   بعضنا كان تصادمى جدا ... كان بيدخل ويا إما يقنع الناس بوجهة نظره يا يهاجمهم...وفى اللى حتى أغلقوا الأكونت بتاعهم عشان قال إيه أصحابى حرقوا دمى بآراءهم !!! والمجموعة اللى مش تصادميه ...إكتفوا بإنهم يكتبوا تعليقات أو يحللوا أو يتفلسفوا أو إنهم بس بيعملوا شير لنوت فيها رأيه أو رأى حد تانى...أو فيديوهات عن اللى حصل أو بيحصل... أو يكتفى بإنه يقوللنا رأيه فى استيتس   أنا بس عاوزه أقول نقطتين:  1- أولا رأيك على الفيس بوك مش هيفرق دلوقتى فى حاجه ...عشان ببساطه كل الفعل ورد الفعل دلوقتى على الأرض...يعنى الشباب اللى فالمظاهرات مش هيروحوا بيوتهم يبصوا  على الفيس بوك عشان يسمعوا رأيك ...ولا هيتفرجوا على التيلفزيون وبعدين يقتنعوا ويقولوا آآآه والله معاه حق اللى بيتكلم ده !!!...ولا اللى رايح يتفاوض هيبص عالفيس عشان يشوف الشعب اللى بيهلل هنا...كله على الأرض...والموقف مرهون بطرفين ...اللى فى إيدهم صناعة القرار... + الشباب اللى فالمظاهرات وبالتالى إنت رأيك هنا مالوش هدف إلا إنك بتسخن من ناس...أو بتسخن الناس حواليك     2- إنت إخترت من الأول إن يكون مكانك الفيس بوك ... وكنت من الصامتين ...إلا اللى كانوا فالمظاهرات ورجعوا يبقى دلوقتى هما خلاص رجعوا... طيب دلوقتى لو انت مش كنت فعّال ...باللى إنت بتكتبه أو بتقوله على الفيس هنا أصبحت صاحب دور فاعل فالموضوع ...لكن للأسف فاعل سلبى...لأنك ساهمت فى نشر الفتنه ...   إنت كده كده دلوقتى مفيش ليك تأثير...تأثيرك فالقرار هيكون وقت الانتخابات او لو ف استفتاء هيحصل...لكن غير كده لو مش فالمظاهرات ...ولو انت مش من لجنة الحكماء ...يبقى هأطلب منك طلب واحد :   لو سمحت إسكت لو عاوز الشباب يكملوا فى ميدان التحرير ...إنزل أقعد معاهم ... لو عاوز الشباب يرجعوا من المظاهرات ...يبقى إنزلهم فالمنطقه اللى بيتظاهروا فيها ...وكلمهم وقللهم رأيك لكن مش تقولنا رأيك هنا لو مش إتسألت عنه ...فالوقت الحاضر خلونا نهدى ...وبعد الأزمة ماتعدى نتكلم تانى ونقول رأينا   لكن إنك تكتب رأيك فى إستيتس هنا ...أو تعمل شير لنوت أو فيديو ...وتبدأ النقاشات والفزلكة والتحليلات ...لو سمحتم الوضع مش ناقص انقسامات ولا فتنه ...خلونا نفكر بعقل ونمنع الضرر اللى ممكن نمنعه   على فكرة الداعية عمرو خالد لما دعا لإنترنت بلا فتنة مكنش يقصد بس الفتنة بين المسلمين والمسيحين ...كان يقصد فتنة زى اللى إحنا فيها دلوقتى ...   نعمل شير لنوت او فيديو او ايفنت بيتكلم عن اللى هنعمله بعد الأزمة...زى مثلا حملة تعمير مصر... لكن اللى بنعمله دلوقتى ده بيسخن ومالوش لازمة فالوقت الحالى   فرجاء نهدى مع بعض ...ونسكـــــت لو مش هنشارك مع شباب المظاهرات   وشكرا

وصفة بسيطة للسلام النفسى

كان ف واحدة صاحبتى النهاردة...كاتبة ستيتس طالبة فيها وصفة سهلة للسعادة... لاقيت نفسى بأرد عليها بمجموعة نقاط...أنا شايفة إنها أول الطريق للسلام النفسى...لأ متفهموش غلط ...أنا لسه موصلتلوش أوى يعنى :) ...لكن أنا شايفة إن السلام النفسى هو أول طريق السعادة...أول على الأقل أول طريق إنك تبقى أقل تمسكا بالأرض...الجاذبية الأرضية تسيبك شوية تطير فالهوا...الأرض تبطل تشدك لتحت ...وبالتالى تآخد حريتك...حرية الحركة...التفكير...الإحساس... تبقى أمور حياتك أسهل وأبسط... تبقى أكثر تقبلا للأمور والواقع وفى نفس الوقت أكثر تقبلا للى جاى فالمستقبل...يعنى حالة بين البينيين ...مابين إنك تدقق أوى وتخطط أوى ...ومابين إنك تبقى بايع...ببساطة تكون مرتاح من جواك ...لكن عندك وجهة نظر وفكر لحياتك أو للمستقبل أو للدنيا حواليك...إنك تسيب إيدك وتطير ده أول طريقك لإرجاع الأمور لأصلها...ولإنك يكون عندك نظرة عميقة...لأن النظرة العميقة فالنهاية هى ناتج إنك بترجع للأصل وللجذر...إنك تطير لكن لسه بترجع فالنهاية للأرض بفعل الجاذبية...لكنك متقبل إنك على الأرض ومتقبل الناس اللى حواليك حتى اللى منهم مش عارف يطير والأرض واخداه أوى...تقدر تتقبله برده وتتعامل معاه...لأنك وإنت طاير شفت كل حاجة من فوق... مش بتحكم ...لأن أكيد فى زاوية إنت مش شايفها ...وبرده إنت عارف إنك مش شايفها وعامل حساب ده ...كل مابتبقى فالحالة دى أكتر ...بتقدر أكتر تتقبل فكرة إنك مش مسيطر كليا على الحياة لأنها عبارة عن دواير متداخلة من ناس كتيرة وأقدار أكتر...كلها مكلكعه مع بعضها... إنت زمان كنت ممكن تفكر إن حياتك كلها بكل عناصرها تحت إيدك وإنت عارف أولها وآخرها...لكن كل مابتدخل فالحالة دى هتلاقى نفسك مش عارف تسيطر عليها أكتر...لكن على الأقل عارف الخطوط العريضة ليها...وده اللى بيخلق المفاجأة...ماهو برده لو إنت عارف إنت موجود ليه وإيه هيحصل بكرة وبعده وهتموت إزاى وكل الأشخاص اللى بتتعامل معاهم إنت عارف إن حكمك عليهم قاطع لأنك عارف اللى فى قلوبهم وجايبهم من أولهم لآخرهم وكل عوامل حياتك ممكن قطعا تنطبق على حيواتهم ...هتبقى حياتك عاملة زى الفيلم المحروق اللى خلاص عرفين الحتة الأكشن اللى فيها...وده مش صح... لأنك لو سيطرت حتى جدلا فرضا على حياتك ...ففى دايما حاجات بتحصل مترتبة على ردود أفعال الناس والظروف ومدى تأثيرها على أفعالك إنت ...لو إنت قدرت تخطط لكل حاجه فى حياتك ومعملتش حساب ان دايرتك متقاطعة مع ناس تانية هتأثر فيها...هتاخد قرارت غلط ومش هتبقى مرن كفاية ...حياتك عاملة زى العربية ...العربية دى عشان تسيطر عليها تماما يبقى تركنها تحت البيت ومتحركهاش...وده هيبقى افضل وضع انت مسيطر فيه...ومع ذلك ممكن واحد عبيط فى زفة يخبطهالك حتى وهى مركونة تحت البيت لابيها ولا عليها...طيب هتتحرك بيها ...يبقى إعمل حسابك إن إنت بس يادوب بتعرف تسوق ...ومش مطلوب منك أكتر من كده...لكن إنت مش مسئول عن أفعال ولاردود أفعال السواقين التانين... يعنى إنت تتحكم بس فى عربيتك اللى هى اصلا هتتأثر هى وسواقتك بسواقة العالم اللى حاوليك...وبالظروف زى المرور والإشارات والزحمة...لو كنت مخطط خطة محكمة انك هتوصل فى 10 دقايق ممكن توصل فى نص ساعه...وساعتها ياإما تطلع راسك من الشباك وتفضل تشتم وتزعق وتتخانق وساعتها هتبوظ اللى لسة باقى من خطتك ويومك كله...او إنك أصلا كنت مرن أثناء التخطيط وعملت حسابك إن ال10 دقايق لو بقوا نص ساعة يبقى مش مشكلة...دى بإختصار ياصديقى حياتك...عربية ... أو كما قال الشاعر الدنيا زى المرجيحة ...

أنا رغيت كتير أوى ومش قلتلكوا على النقاط اللى كتبتها لصاحبتى اللى كانت بتسأل عن السعادة وأنا جاوبتها عن السلام النفسى... هأقتبس النقاط دى فالآتى:

• خدى كل الأمور ببساطة

• آمنى بإن أى موقف صعب تمرى بيه هيعدى وينتهى ويبقى ذكرى زى كل المواقف الصعبة اللى دخلتيها قبل كده وكنتى متخيلة انها مش هتعدى...عدت وانتهت

• آمنى بإن عشان تشوفى السعادة وتحسى بطعمها لازم تقابلى الألم والحرن

• لازم تكونى دايما فى حركة ونشاط...يعنى بتفكرى فى أفكار جديدة ...بتعملى حاجه..داخلة فى دواير ومعارف جديدة...حتى لو بتجددى المعارف القديمة...حتى لو قاعدة فى مكانك ومش بتتحركى ...المهم متسيبيش نفسك لإن مخك يكون فاضى لأن لو ده حصل تبقى بتسيبى نفسك للأفكار اللى غالبا بتكون مزعجة

• حاولى دايما تكونى متسامحة...إذكرى دايما إن اللى أساء ليكى ده هو الأضعف ...وإنك لو سامحتيه تبقى طهرتى قلبك من زعل او كره...فى نفس الوقت ملكتيه لأنك كنتى أقوى منه وقهرتى الحزن والشر فى قلبك

• خللى دنيتك وحياتك ملكك إنتى..ديركسيون حياتك فى إيدك...إنتى اللى سايقه مش حد سايقلك

الحاجات دى تبان إنها كلام إنشاء ...لكن أنا فعلا حساه جدا من جوايا ...وصدقونى دى وصفة ناجحة جدا

أتمنالكم كلكم السلام والهدوء النفسى...