وها أنا ذا ...الغريبه إنى كان مفروض أرجع أكتب من زمان أوى وأتكلم عن حاجات كتير أوى... حاجات مش لازم تتنسى ...بتفاصيلها .. بحلوها ومرّها... عشان أنا فى الفترة اللى فاتت دى شفت ومريت بحاجات كتير وإتحركت فى أماكن كتير .. وإتعلمت حاجات كتير... وحاسه إن حاجات كتير وأفكار كتير إتغيرت فيا ...بقيت أنا مش أنا ... أنا مش عارفنى ...
بس لاقيت اللى حصل معايا إمبارح... على الرغم من إنه مش جديد ؛ بيدفعنى للكتابه تانى.. وده لأنه فكرنى بشوية حاجات لازم أعملها توثيق للذكرى وكمان عشان أبقى أشوفها وأتعلم منها وأفتكر نفسى كنت إزاى فى الفترة دى...زى بالظبط اللى حصل معايا دلوقتى...كتاباتى القديمة هى اللى كنت باحاول من خلالها فى الفترة اللى فاتت إنى أفتكر أنا مين...فكرتنى إنى كنت فى فتره عندى أفكار ذهبية ولازم أرجع كده تانى...فكرتنى لإنى كان عندى مشاعر وعواطف تملأ الكون كله حب ولازم أحاول أرجعها تانى عشان يرجع الدفء جوايا تانى... بجد بقالى سنه بالظبط تايهة وشبه فاقده الذاكرة ومحتاجة أفتكر كنت مين وبأعمل إيه...
كنت أخذت قرار إنى مش عدت هأكتب حاجه تانى؛ مش عشان مفيش حاجه تستحق التوثيق؛ بالعكس..بس عشان لاقيت إن مفيش أى حاجه دايمه، كل شئ بيروح ويتبدد فى ثوانى؛ الحب، الصداقة، العشرة، الاحلام ...حتى الثقة...ده حتى الزوج والزوجه اللى عاشوا مع بعض لسنين ممكن فى لحظة يتكون بينهم جدار الثلج ويبقوا أغراب عن بعض...معدش ف كلمة إسمها "للأبد" الكلمة دى بقت ملهاش طعم ولامعنى عندى...
أنا عارفه إنى مش بأقول حاجه جديدة ؛ بس أنا لسه بأتعلم؛ ف أما وصلت للحقيقة دى كانت جديدة عندى ... وأنا من النوع اللى مش بيصدق إلا أما يشوف ويجرب بنفسه...
كمان قلت مش هأكتب تانى لأنى وقت ما كنت بأكتب كنت كتبت حاجات حطيت فيها أغلى مشاعرى وأفكارى وقت كتابتها كنت حساها كنز غالى أوى؛ بس بعد كده كانت سبب زيادة ألمى وجرحى كل السنه ونص اللى فاتوا؛ مش لأنى ندمت على اللى كتبته؛ لأ مش ندمت ولا حاجه دى كانت أفكار ومشاعر صح أوى فى وقتها..كنت حاساها أوى ومقتنعة بيها جدا... لكن اللى كتبته زمان ده ساعد على إنى كل ما أقرأه تانى أفتكر أد إيه ممكن تكون الحقايق قدامنا ونبقى مش عاوزين نسمع ولانشوف؛ وقت ماتكون الحقايق واضحة كنت بأطردها من تفكيرى وبأغمض عينيا... ممكن إننا بإيدينا نسهل للآخرين خداعنا واللعب بينا ...
بس أرجع وأقول إنى لو كنت مش إتعرضت لأى حاجه صعبه فى حياتى مش كنت هأتعلم ولسه ياما هنتعلم...مش كنت هأبقى الشخصية اللى أنا عليها دلوقتى...بجد الحمد لله على كل اللى حصل ليا فى حياتى ... يمكن يكون فِ ناس حصل معاهم أكتر من كده... الحمد لله دلوقتى بجد بأشوف اللى من سنى منهم اللى لسه بيقع فى نفس المطبات اللى وقعت أنا فيها من 6 وللا 7 سنين...ومنهم اللى عمره أصلا ماهيكبر ولا يبقى زى الكبار ويحصلله زيهم !!
من الآخر؛ أنا رجعت النهاردة أكتب عشان أقول إنى هأرجع أكتب تانى اللى بأشوفه واللى بأحسه...واللى يحصل يحصل بقى...ده اللى هنشوفه مع بعض..وربنا يستر...
No comments:
Post a Comment